حوار مع الزوجة الثانية

حوار مع الزوجة الثانية

بقلم/ غادة علي عبدالمقصود

أنا زوجة ثانية لزوج مطلق وعنده أولاد من الزوجة الأولي.

هو تقدم لي عن طريق إحدي المعارف .
يعمل في منصب مرموق و حساس.

زوجي محترم ، في حاله ، مخلص لعمله و محبوب جداً بين أصدقائه في العمل والمحيطين.

عندم تقدم لي لم يتحدث بأي سوء عن أم أولاده .
علي فكرة إلي الأن لم يتحدث عنها بأي شيء.

أنا. …إيه سبب الإنفصال ؟

الزوجة …. أسباب كتير وتراكمات.

أنا …. موقف الأولاد إية من زواج الأب ؟

الزوجة …. عارفين و موافقين .

أما بالنسبة لأهلي تمت الموافقة بعد السؤال كويس والتأكد من صدق كلام العريس. ” الزوج” .
وتم الزواج في خلال فترة قصيرة جداً تقريباً شهرين لأن الزوج كان لازم يسافر فترة لطبيعة شغله .

أنا ….. ليه الإستعجال ؟! تفتكري شهرين فترة كافية للتعارف وتقارب وجهات النظر ؟

الزوجة …. لا طبعاً بس ده إلا حصل ، سبحان الله ربنا كان ميسر كل شيء.

بعد أقل من شهر من الزواج بدأت المشاكل.
أم الأولاد والأولاد كمان رغم إنهم كانوا عارفين إن الأب هيتزوج ، لكن الكلام حاجة والواقع حاجة تانية خالص…..

أنا. .. هو إنتي كنتي متوقعة حاجة تانية ؟!
أولاد وزوجه وفي أقل من شهرين أو ثلاثة زوجه تانيه خطفت الأب والزوج وهدت البيت ، كان لازم تتوقعي كل ده .

الزوجة . …علي فكرة أنا و أهلي قبل الزواج عرضنا عليه إنه يرجع لزوجته وهو رفض وقال هذا أفضل بكتير للجميع وبالأخص الأولاد.
من وجهة نظره إن البعد أفضل البعد لأن طول ماهما مع بعض في مشاكل وعدم إستقرار و طبعاً ده مش في صالح الأولاد.

الزوجة …. زوجي دائماً يقول إن هو وأم الأولاد لم ينجحوا كزوجين لكن ممكن ينجحوا كأم وأب وهذا أفضل بكتير الأولاد.

أنا …. فين بقا المشاكل ؟

الزوجة …. يااااه مشاكل بالنسبة لي إني “خطافت رجالة ” ، ” مرات أب “……
وبالنسبة لزوجي كل يوم مشكلة ، وناس تحاول تحل وناس تمشي ، ناس تيجي وكلام كتير… …

وطبعاً معظم الناس متعاطفة مع الزوجة الأولي.

سألته هي الناس إللي بتتواصل للصلح ماظهروش قبل ماتتزوجني ليه!!

رد علي وقال مين قالك إني ماكنتش بعمل كل إللي بيطلبوه مني وبردو مافيش أي فايده.

و عرفت إن أحد الأطراف طلب منه إنه يطلقني بحجة إن لسه مافيش أولاد ، إن لسه في البداية و إن الزوجة الأولى خلاص هتتغير وهتبدأ صفحة جديدة!!!

أنا …. ده شئ طبيعي بس الأهم رد فعل الزوج إيه ؟

الزوجة …… بصراحة هو رد فعله كان غير متوقع!!
رد علي الشخص الوسيط بإستغراب و قاله إستحالة طبعاً هو دخول بيوت الناس لعبه !! إيه ذنب البنت إللي تزوجتها ؟!

أنا …. ممكن أعرف العلاقة وصلت لفين بين الزوج والأبناء ؟

الزوجة ….. كانت كويسة نوعاً ما.
وبصراحة أنا كمان قربت جداً من الأولاد وتعاملت معاهم بما يرضي الله.
لأنهم ملهمش ذنب في أي حاجة.

فضلت علاقتي بالأولاد كويسة جداً ومازالت حتي الآن.
أم بالنسبة لزوجي علاقته بأولاده إتحسنت كتير وده بشهادة المقربين ليهم.

أنا ….. والزوجة الأولي وصلت لفين مع زوجك ؟

الزوجة ….. فضلت المشاكل تتصاعد
لدرجة إني طلبت منه أكثر من مرة إنه يرجعها علشان خاطر الأولاد ومستقبلهم لكن هو كان بيرفض بشدة .

أنا ….. لو كان وافق ورجعها تفتكري المشاكل كانت هتنتهي ؟

الزوجة …. معرفش بس علي الأقل أنا أمام ربنا عملت إللي عليا.
علي فكرة أنا قولت إني علي إستعداد الإنسحاب من حياته وكل واحد يروح لحاله.
لكن هو بصراحة رفض وطلب مني عدم الكلام في هذا الموضوع إطلاقاً.

الزوجة …..أنا فاكره جمله قالها وقتها ” إنه لو آخر يوم في حياته لايمكن ابداااااااا يرجعها ”
وقال أيضاً إنه مهم يحصل ” لا يمكن يقدر يبعد عني ” .

أنا …. وإنتي فعلاً كنتي مستعده للإنفصال ؟

الزوجة . لا خالص لأني كنت بدأت أحبه بس أعمل إيه المشاكل مستمرة وضغط نفسي وعصبي رهيب.
و تعبت جداً .

أنا …..والدنيا دلوقتي عاملة أية ؟
الزوجة… . بدأنا نتجاهل إللي بيحصل أو بمعنى أصح ” إتعودنا ” .
والأولاد كبرت وتزوجوا الحمدلله.

عارفه والله العظيم بشهادة جميع الأهل إني غيرت حياتي زوجي 180 درجة مع كل المحيطين حتي مع أهله.
لأنه كانت الزوجة الأولى دائمة المشاكل مع الكل وبالذات الأهل.
طبعاً الجميع قال هذا الكلام.

عمري ما هنسي جمله قالها أخوي زوجي ” إني رجعت أخوهم للحياة مرة أخرى “

كان بيتي مفتوح للجميع لدرجة إن الأولاد كانوا بيعزموا أصحابهم عندي.

أنا ….فعلاً ذي ما بنقول “لكل قاعدة شواذ ” .

في حالة حضرتك الزوجة الثانية ليست ” خطافت رجالة ” ولا ” مرات أب “

الله المستعان .

الزوجة الثانية
بقلم/
غادة علي