حوار مع مطلقة

حوار مع مطلقة .

بقلم /
غادة علي عبدالمقصود

_المطلقة … كنت أنا الإبنة الأكبر
عندي إتنين أخوات ولاد وأخت صغيرة .

أنا صيدلانية ، أخويا الأصغر مني ظابط طيار ،
إللى بعده دكتور في الجامعة
و أختي الصغيرة خريجة هندسة .

إخواتي تزوجوا حتي أختي الأصغر مني بحوالي 13 سنة .

كان عندي في الوقت ده خمسة و ثلاثين سنة .
كان بيتقدم لي ناس كان منهم الغير مناسب أو إللي يجي ومايرجعش تاني .
إتقدم لي زوجي وكان أكبر مني بحوالي عشر سنوات ، بيشتغل في مركز مهم في البلد ، يعني مواصفات معظم البنات تتمناها لكنه كان مطلق وعنده أولاد أكبرهم كان في الثانوية .

وافقت وأهلي كمان وافقوا .
وتم الزواج في أقل من شهر .

=أنا …. أقل من شهر ؟!!
ليه السرعة دي ؟!!
أنتوا حتى مالحقتوش تسألوا على بعض !!!

_المطلقة….. لا هو كان سأل كويس ما أنا قلتلك إنه بيشتغل في مكان مرموق لو عايز يعرف أي حاجة عن أي حد في أقل من ساعتين المعلومات كلها تكون عنده .

=أنا …. طيب وإنتوا سألتوا عليه وعرفتوا سبب طلاقه إيه ؟

_المطلقة …. بالصدفة كان في واحد صاحب أخويا بيشتغل في نفس المكان أخويا سأله ” بصراحة مجرد ما سمع إسم العريس شكر فيه وقال إنه حد كويس جداً ومحترم ” .

=أنا …. ماشي بس إيه سبب السرعة في الزواج ؟

_المطلقة … هو كان مستعجل ، كان بيقول إنه مش شايف إن في سبب للتأجيل !!

=أنا … طيب وأهلك ليه وافقوا بالسرعة دي ؟!

_المطلقة …. معرفش ؟
محدش إعترض و طالما إنه حد كويس ومحترم خلاص تمام. .
تم الزواج

=أنا …. و رائيك إنتي كان إيه ؟!!

_المطلقة …. بصراحة كنت مرحبه .
كنت عايزه أتزوج علشان أهرب من نظرات أهلي وكلامهم لأني إتأخرت في الزواج ويعتبر هو أفضل الناس إللي كانوا بيتقدموا لي في الفترة دي .

=أنا …. إنتي شايفه إن الكلام ده صح ؟

_المطلقة …. دلوقتي لا .
بس وقتها اه .

=أنا …. كملي .

_المطلقة …. تزوجنا في شقة كانت حلوه اوي ، في مكان راقي جداً و مفروشه بالكامل أنا جبت حاجات بسيطة .
علي فكرة إكتشفت إن السرعة مش في موضوع الزواج فقط لا السرعة كانت سمة أو صفة أساسية من طبيعة زوجي .
والحمدلله عدي أول شهر كويس وذي الفل .
بدأت المشاكل بعد شهر أو بكتيره شهرين .
إختلاف الأطباع ، التفكير ، تقريباً كنا مختلفين في كل حاجة .

=أنا …. ده شئ طبيعي بسبب سرعة الزواج مافهمتوش ولا حتي أتعرفتوا على بعض !!

_المطلقة …. هو كان طيب بس عصبي وأنا كمان كنت عصبية.
وطبعاً هو عنده اهتمامات تانية وبحكم شغله مش فاضي ومشغول على طول .

=أنا …. أولاده كانوا فين ؟

_المطلقة … كانوا مع والدتهم في ڤيلا في قريتهم وطبعاً زوجي كان متكفل بيهم حتي طاليقته .

=أنا …. ممكن أعرف موقف الأولاد إيه من زواج الأب ؟

_المطلقة …. عادي كانوا موافقين مافيش مشاكل .

=أنا …. طيب دي حاجة كويسة .

_المطلقة …. مشكلتي مش في الأولاد ؟
المشكلة كانت بيني وبينه هو .
هو كان من وجهت نظره طالما الأكل والشرب والحياة المادية تمام يبقى مش ناقصك أي حاجة تانية .

لكن أنا كان ناقصني حاجات كتير اووووي .

كنت محتاجه زوجي المفروض إني كنت لسه عروسة محتاجة أخرج ، أتفسح ، محتاجة أحب و أتحب .
الحياة مش فلوس وبس .

=أنا …. إختلاف في وجهات النظر ده شئ طبيعي بسبب فرق السن و هو كمان عاش حياته قبل كده وإنتي كنتي لسه بدأه تكوني أسرة و حياة جديدة .

_المطلقة …. كل ده حقيقي بالإضافة إلى إختلاف الأطباع .
مع مرور الوقت بدأ لسانه يطول .
إتكلمت معاه كتير بخصوص الموضوع ده لأنه ماينفعش بأي شكل نوصل للمرحلة دى ، لكنه ولا حياة لمن تنادي .
تفاقمت المشاكل بعد ما مد أيده علي أكتر من مرة !!

بدأت أنا أطلب منه الطلاق .
لكنه كان بيرفض .

=أنا …. أهلك كانوا فين في هذه المرحلة ؟!!

_المطلقة … للأسف الشديد ما كنتش بعرفهم أي حاجة ، على أمل إني أوصل معاه لحل .
لكني عندما فشلت في الحوار معاه وقتها دخلت أهلي .
لكنه كان دائماً بيقلب التربيزة عليا أنا وإني سبب المشاكل .

=أنا … فضلت كام سنة متزوجة ؟

_المطلقة …. 12 سنة .

=أنا …. في أولاد ؟

_المطلقة ….. لا حاولنا كتير بس ماكنش في نصيب الحمدلله .

=أنا … وبعدين وصلتي لفين ؟

_المطلقة …. طلبت منه الطلاق كتير والمشاكل كترت أكتر في مرة حصلت بينا مشكلة وطول لسانه وأنا كمان رديت عليه بنفس أسلوبه في الوقت ده ” قالي إنتي طالق ” .

علي قد ماكنت بطلب منه الطلاق كتير لكن لما قالها حسيت وقتها بحاجة غريبة زعل علي إنكسار علي حاجات كتير .

المهم رجعت عند أهلي .

=أنا ….. كان رد فعلهم إيه ؟

_المطلقة …. أقولك حاجة .
ماكنتش متوقعة رد فعلهم خالص .
معظمهم إن ماكنش كلهم كانوا بيقولوا الحمدلله كده أفضل وأحسن .

=أنا …. ياااااه لدرجة دي هو كان وحش معاكي ؟!

_المطلقة …. هم كانوا زعلانين على إللي كان بيحصل معايا لأني فعلاً ماكنتش أستاهل إللي هو بيعمله معايا .

=أنا …. ده من وجهة نظرك ونظرهم !!

_المطلقة …. والله لا .
حتي أهله وأقاربه كلهم .
معظم المقربين منه قالوا لي إن هو الخسران لأنهم كانوا شهود علي بعض المشاكل إللي كانت بينا .

=أنا …. طيب تمام ده اللي حضرتك كنتي عيزاه والواضح كمان إن أهلك كانوا عايزين كده !!

_المطلقة …. بعد كام شهر من الطلاق حسيت إني حاسة بالوحدة ومحتاجة بيتي !!

=أنا …. ده شعور طبيعي لكن المفروض إنك بسبب المشاكل إللي بينكم تكوني مستريحة علشان المشاكل خلصت !

_المطلقة …. الطلاق صعب أوووووي .
مش حاجة ساهلة خالص .
الحياة بعد الطلاق مش لطيفة والوحدة صعبة جداً .

اه الدنيا هادية .
لكني جوايا شخصيتان :
شخصية : بتقول إنتي كده الحمدلله أفضل بكتير وإنك تستاهلي أفضل منه مية مرة .
والشخصية التانية : بتقول إنه في حاجات كتير كويسة وإن البيوت ياما بيحصل فيها .

خصوصاً إنه بيحاول وبيكلم الناس كلها علشان يرجعلي رغم إن أهلي رافضين الكلام في الموضوع ده تماماً .
=انا…حالتك المادية كويسة؟

_المطلقة …. ماديا الحمدلله.
أنا وماما بناخد معاش والدي والمعاش كويس جداً .
بالإضافة إلى مرتبي و معاش ماما .

وأنا أصلا مقيمة بعد الطلاق في شقتي بتاعت بابا .

والدي الله يرحمه باني عمارة ولكل واحد فينا شقة بتاعتة .

أنا و ماما مقيمين مع بعض شوية في شقتي و شوية في شقة ماما في نفس العمارة .

لكن أنا حاسه بشئ غريب معرفش هو ايه ؟
مذبذبه ومش عارفة أخد أي قرار ؟!

هو زي مابنقول كلم طوب الأرض علشان يأثروا على أخويا.

لأن أخويا قافل عليه أي مدخل .

=أنا …. ليه أخوكي واخد الموقف ده ؟
أكيد زوجك ندم وحاسس إنه مايقدرش يعيش من غيرك بدليل أنه حاول كتير زي حضرتك مابتقولي ؟

_المطلقة …. من وجهة نظر أخويا بيقول لا
لأنه إستنفذ كل الفرص خلاص كده .

لأن قبل الطلاق لما أخواتي كانوا بيعرفوا المشكلة ويدخلوا فيها كانوا بيجوا عليا مرات كتير علشان المركب تمشي فزوجي في الوقت ده أستغل الموضوع .

=أنا …. إنتي ماتكلمتيش مع أخوكي علشان توصلوا لحل !!

_المطلقة …. للأسف أخويا من النوع اللي كلمته هو بس إللي بتمشي وكمان مابياخدش رأيي في أي حاجة ولا حتي بعرف إن حد بيتكلم معاه .

أنا كنت بعرف إن طليقي بيحاول وعايز نرجع من الأشخاص الوسطاء .

=أنا …. ليه أخوكي كان بيعمل كده ؟ مع إن إنتي الوحيدة صاحبة القرار خصوصاً إنك كبيرة ومثقفة وتقدري تحددي قرارك صح و بعدين دي حياتك إنتي !!!

_المطلقة ….هو طابعه كده في كل حاجة ومع أي حد ، هو بس صاحب القرار !!!

هو أصلا ماكنش يعرف إن الوسطاء بيتكلموا معايا .

=أنا …. للدرجة دي التحكم ؟
طيب أهلك فين والدتك ، إخواتك الآخرين ” أخوالك و أعمامك ” أي شخص كبير في العائلة ؟

_المطلقة …. مهو أخويا مش بيكبر لحد دايما بيرفض ويصد أي شخص بيدخل منهم .

وبعدين أنا حاسة إن ماما متفقة معاه ونفس رأيه ، أما أخواتي الأتنين متزوجين ومقيمين في دولة عربية تانية بس الأتنين بيقولوا الرأي يخصك إنتي ” إنتي تقدري تاخدي القرار كويس ”
مع إني بقالي سنة وسبع شهور منفصلة طليقي تقريباً بيبعت كل أسبوع شخص جديد علشان نرجع .
وكل الأشخاص بيأكدوا إنه ندمان وإتغير كتير .
يمكن إصراره ده والكلام اللي الأشخاص بيقولوه عن التغيير والندم ده .
بيزود حيرتي .

بجد مش عارفه أخد قرار .
عقلي مشوش ومش عارفه أفكر صح .

حوار مع مطلقة .

غادة علي