حوار مع زوجين .
بقلم / غادة علي عبدالمقصود
حوار النهارده مختلف .
الحوار مع طرفي الحكاية ” المشكلة ” .
معانا زوج مغترب هيحكي الحكاية من وجهة نظره ، الزوجة هتتكلم من وجهة نظرها أيضاً .
وهما هينتظروا الحل من السادة القراء وهيرضوا وهيعملوا بالحل إللي هتقولوا عليه
” يعني هما هيقرأوا كل التعليقات”.
_الزوج المغترب … أنا تزوجت في سن. صغير رغم الظروف الصعبة والإمكانيات البسيطة .
لكني لم أستسلم ، كافحت ، إشتغلت أكتر من شغلانه و في الآخر قررت أسافر أي دولة أخرى حتى أعمل حياة كريمة لأسرتي .
زوجتي كانت جارتي حبيتها بعد الزواج .
وحبيتها أكتر لأنها إستحملت كل ظروفي وفضلت تساندني بكل الطرق .
هي سافرت معايا فترة ولكنها لم تستطيع الغربة وقررت مرة واحدة إنها عايزة تنزل تعيش في مصر لأنها مش عارفه تتأقلم مع الحياة في الغربة ، و فعلاً نزلت وإستقرت هي و بنتنا الوحيدة في قريتنا .
لكني محتاج زوجه معي في الغربة و إتكلمت معاها كتير جداً ولكنها مصره على رأيها .
فقررت إني أتزوج ونزلت أجازة ، وتزوجت وسافرت أنا و زوجتي الجديدة .
الأن أنا وهي مستقرين مع بعض وفي نفس الوقت مش مقصر مع زوجتي الأولي وبنتي في أي حاجة .
كل طلباتهم مجابه الحمدلله .
_الزوجة الأولي … إحنا كنا جيران وكنت بحبه أوي قبل مايتقدم لي ” حب بيني وبين نفسي ” .
كنت مبسوطه لما اتقدم لي والحمدلله تم الزواج .
الحياة كانت مستقرة وكل شيء علي مايرام ، لكني مش عارفه أستحمل إحساس الغربة مع إني حاولت كتير والله بس ماقدرتش بجد .
ونزلت قريتنا وسط أهلي .
لكني عرفت بالصدفة إنه تزوج من وحدة تانية !!!!!
وشوفت صور ليهم مع بعض .
إتجننت .
إتصلت بيه و سألته قالي إنه فعلاً تزوج !!
وده حقه لأنه محتاج زوجه تكون معاه .
طيب وحقي أنا فين ؟!!
وحب السنين راح كده ؟!
حقيقي مش قادره أصدق ولا أستحمل إن حبيبي ، زوجي ، أبو بنتي وشريك العمر يكون مع حد غيري !!
المشكلة إنه ما تزوجش أي حد ؟!!
لا تزوج من حبيبته الأولي ” الحب الأول ” !
هو كان بيحب زميله له قبل أن يتزوجني ، واتقدم لها لكن بسبب ظروفه أهلها رفضوه ، وتزوجت حد تاني كانت ظروفه كويسة .
وبعد فترة إحنا تزوجنا .
أنا كنت عارفه كل دا لأني كنت متابعة كل أخباره ” ما أنا كنت بحبه ” .
بس عدت كام سنة وخلاص أنا وهو تزوجنا وكمان عندنا بنوته جميله .
مرة واحدة كده بعد سبع سنين زواج ماحصلش فيهم أي مشكلة ولا خلاف بينا خالص لأني كنت بحاول أرضيه بكل الطرق ” غير موضوع الغربة ده ” ،
حياتي كلها تتلخبط ؟!!!
وبيتي يتهدى ؟
وحب عمري حد تاني ياخده كده بسهولة ؟!!
كان يقولي لازم أفضل معاه لإما يتزوج بأخري .
كنت ساعتها غيرتي رأيى و جيت علي نفسي و إستحملت كل حاجه بس ما يتزوجش حد علي !!!
وإشمعنا دي ؟
وفكرة الزواج جت مره واحده كده ولا لما عرف إن حبه الأول إطلقت ؟!
بعدين هو بيقول إنه مش مقصر معايا أنا وبنته ؟
من ناحية الفلوس اه مش مقصر خالص .
لكن من ناحية إن له بنت ومحتاجة تشوفه وتلعب معاه وتكبر مع أبوها هو مش موجود .
أما أنا كزوجة……….
أنا وبنته فين من حياته دلوقتي ؟
بقاله سنة و نص من بعد ما تزوج وهو مانزلش غير مره واحده بس !!
لما قولتله إني عايزة أطلق وطلبت من أهله يبلغوه أيضاً .
فلذلك أنا بطلب منه الطلاق ومصره عليه .
هو طبعاً رافض الكلام في موضوع الطلاق بحجة إن زواجه التاني من حقه ؟!
ومش مخلينا محتاجين أي حاجة ؟!
لكنه ناسي أهم من الفلوس والهدايا ؟؟
إحنا محتاجينه هو …..
=أنا …. محتاجين نعرف رأيكم هل من حقها الطلاق ؟ ولا طالما الزوج بيصرف كويس تصبر وتعيش ؟
وهل من حق الزوج طالما مقتدر إنه يتزوج بأخرى ؟
حوار مع زوجين .
غادة علي
Post Views: 578
