كانت صُدفه…
فاكر لمَّا قابلتك مَرَّه
صُدفه فى سهره؟
كنت حزين وعيونَك شارده
سارح فى المجهول بتعاني
من ضحكات الناس الصَفره
كانوا كتير حواليك بيغَنُّوا
وبيتمايلوا بعقول تايهه
وبيتغامزوا وبيتهامسوا
جُوَّه عوالم فارغه وتافهه
حتى كلامهم كان مُتصنِّع
مالهوش معنى
وانت لوحدك قاعد تِسمع
وتُبص لفنجان القهوه
كان الوقت عليك بيعدِّي
زي عقارب ساعه قديمه
تحسب ثانيه وتسيب ثانيه
فجأه لقيتني جيت على سَهوَه
من غير حتى ما اقدم نفسي
أو تعرفني
أو أسمح لك تُرفض عرضي
إني اواسيك
واعرف سر الحزن الساكن
جُوَّه عينيك
وامَّا سألتك ساكت ليه؟
وليه مش عايش
وِسط الناس البايعه الدنيا؟
شفت سنين العمر الضايعه
راسمه ملامحك
زي الورده لمَّا بتسقط
ورقه بورقه
إتألمت كتير وبكيت
كان الدمع المالي عيونَك
محتاج فرصه
واتكلمت ساعات وحكيت
من غير حتى ما أنطق كلمه
كنت بحاول أسمع مِنَّك أي حكايه
وانا جُوايا مليون فكره
كل كلامك كان عَ الماضي
اللي ماليش جواه ولا خطوه
وان لقاءنا كان مش عادي
رغم الصدفه
لكن الأغرب..
إن الصدفه صبحت ذِكرىَ
من غير حتى ماييجي فى بالك
تعرف إسمي أو تسمعني!
أو تسمح لي ولو لثواني أعبَّر عَنِّي
أو تسألني…
هاشوفِك بُكره؟؟
فاطمة المرسي
Post Views: 728
التالي
منذ يوم واحد
توقيع الكشف الطبي وصرف العلاج بالمجان لـ 1627 مريض من أبناء قرية أبو عمران بكفر صقر بالشرقية
منذ 4 أيام
قصة الطفل وشجرة التفاح .
مارس 28, 2024
كسوف كامل للشمس
مارس 21, 2024
الامن يضبط دجال النزهة ويقدمه للنيابة العامة
مارس 13, 2024
محافظ القليوبية يستقبل أعضاء البنك الزراعي المصري لتقديم تبرع بمبلغ نصف مليون جنيه لصالح الأسر الأكثر احتياجا
زر الذهاب إلى الأعلى
Don`t copy text!