احاسيس بقلم الشاعرة سارة عزب

احاسيس

بقلم الشاعرة سارة عزب

زي دموع طفل في سنة أولي
عيط أول يوم مدرسته
وقت ما حس ب إنه وحيد
زي عجوز بيعدي الشارع
مد ايديه للخلق تساعده
علشان حس ب إنه بعيد
زي ممثل ساب المهنة
ولسه في عينه الناس جمهور
زي كفيف من بعد الحادثة
لسه بيوصف شكل النور
زي مسافر بات في السكة
علشان فوت اخر قطر
زي اما اجي اكتبلك غنوة
وانسي اكتبلك آخر سطر
زي مخدر كان في عروقك
ساب علامات أشكال وألوان
زي ما فيه إدمان للكيميا
زي ما قربك كان إدمان
زي المخرج لما يفركش
قبل ما يبقي المشهد خالص
زي ما أي حاجات في حياتنا
فيها تملي شعور كان ناقص
زي ما بعد القرب غياب
زي ما بعد البعد عتاب
زي ملامح اوكرة باب
سايبة اديكي عليها علامة
زي قميص متفصل دايما
نفس الجرح ونفس الخامة
زي ما شيكا بيلعب دايما
بس بيخسر آخر فورة
زي ما بكتب واوصف لسه
وبفشل برضو في رسم الصورة
Sara Azab