ولسة الحلم بنوتة

للشاعرة الكبيرة سميرة محمودى
******************
ولسة الحلم بنوتة
بتتعايق بلبس العيد
واسويرة وكام خاتم
وحق كريم مع البلسم
يخلي شعرها السايب
بدون تجاعيد
وساعة يد في اوضتها
تمد ايديها علي الساعة
تقربها
عشان ماتقرب المواعيد
ولمعة عينها فرحانة
باول حب
فتسهر تحسب الحسبة
بيهواني
صحيح عينه دي عشقاني
اخاف لو عينه نسياني
واه ياني
باخاف لحبيبي ينساني
تعيد وتزيد
ولسة الحلم اهو عايش
مع الاحلام
بيتمني
ولسة الصورة للطفلة
بتتكمل
وزي حورية تتزوق
وتتجمل
تحب تغير تنام تسهر
وتنهي قصة الاحلام
وتبدأها من الاول

سميرة محمودي