النجمة فريدة سيف النصر في حوار صريح جداً وتصريحات خاصة وأمنياتها بـ2021

عادل أدهم قال لي عمر التمثيل ما كان بالمتر ده زى الالماظ بالمللي

تاريخ السينما أنتهى بعد محمود عبد العزيز وأحمد زكي ونور الشريف

دوري في موسى هنتكلم عليه لوحده كتير لان المسلسل مليان ناس انا شخصيا احب تمثيلهم

إعداد وحوار: دعاء سنبل

فريدة سيف النصر نجمة من طراز خاص، متميزة و صاحبة كاريزما وإطلالة تخطف الأنظار بمجرد ظهورها على الشاشة، ملامحها الجذابة وقوامها الملفوف، بالأضافة لخفة ظلها وعفويتها. جعلت المخرجين يحاولون حصرها في أدوار  الإغراء بسبب جمالها وخفة ظلها ، لكن بارعة أدائها وتنوع اختيارها للأدوار جعل المخرجين ينظروا لها بنظرة مختلفة. ويضعونها في أدوار مركبة وصعبة لا تعتمد على الشكل اطلاقا. مثل دورها في مسلسل بدون ذكر اسماء، ودورها في مسلسل حواديت الشانزليزية، فهي حقاً نجمة تستحق التقدير.

في حوار خاص  اليوم وبكل كل صراحة فتحت نجمتنا قلبها لـ جريدة التايم المصرية. وجاوبت على اسئلتي بكل وضوح.

بدايتاً فين نجمة بحجم موهبة فريدة سيف النصر من السينما وبطولة الأعمال الدرامية ؟ ايه السبب في قلة ظهورك وعدم أخذ المساحة التي تستحقها نجمة مثلك؟

 السينما هي اللي فين مني ..معلش مع احترامي لكل الموجودين وعلى راسي مواهبهم كلهم..بس باختصار خلاص خلصت ياقلبي .. لما تتكلموا عن تاريخ السينما تبدأوا بالابيض واسود وينتهوا لحد جيل نور الشريف ومحمود عبد  وأحمد زكي، بمخرجينهم .. معلش انا صريحة حتي علي مستوي الفيديو.

فَريدة سيف النصر مع وائل الأبراشي

بصي طول ما بنقلد فوتو كوبي الأجنبي اكشن وحب فج وحريه زايفه طول مااحنا نرجع ورا..علشان توصل للعالمية لابد تستغرق في المحلية ..يعني لا فيلا علي طول وقصور وعربيات بحق عمارات تلم الغلابة. واخيرا وصلوا للطائرات أي عيشه دي وفين ومين عشره اتناشر مثلا في مصر طيب والباقي ايه مالهمش حكايات تطرح ونحط لها حل ده اسمه تذويق وتزييف للواقع اللي هو مش ده خاااااااالص .. وطالما الفنان شارك في الزيف يتعود. ومينفعش يقول وانا مالي لازم يكون عنده قواضي بيدافع عنها ويتبناها. و اللى نقلب كله ست كوم ومانت ميحكش ونقول مسلسلات درامية .. ومانعت مدش بقي ع الحدوته والسيناريو والحوار المهم جدا.،لكن نعتمد ع الاستاذ فورمة الساحل والهانم بوز البطه ونفخ جميع أعضاء الجسم..حاجه تنرفز مش كده والله ابدا الحمدلله اني لحقت ادخل تاريخ السينما بكام فيلم ..الغيبوبة لـ يوسف ادريس..صراع الاحفاد نور الشريف..اصدقاء الشيطان فريد شوقي نور.. محمد ياسين إخراج. قفص الحريم حسين كمال ..انغام .بركات.. نص ارنب لـ محمد خان..جبر الخواطر.عاطف الطيب..الشقة من حق الزوجة ..الحلال والحرام ، مين فينا الحرامي عادل امام .. يكفي بدايتي قاصرات في الاحداث فيلم الضحايا مع مين ولا مين اقول المخرجين ولا الابطال ولا الكتاب .. اسكتي انا مقولتش واحد على عشره..انا حضرت العمالقة ولذلك لااهتم ..ياشيخه ده حتي بعض الافلام زمان قالوا عليها مقاولات يعني انتاج صغير بفلوس قليله وتكسب من وراها .. لما تبص لهم دلوقتي تقولي ماحدش ينطق ويقول كده تاني تعتبر افلام اكبر من اي فيلم حاليا ليه؟ لهم قصه وكان ابطالها مين..إسعاد يونس، سمير غانم ،سعيد صالح،. يونس شلبي، وحيد سيف الموجي وكتير كتير كتير ابطال المقاولات دول مافيش ظفرهم حاليا..هما اللي مقاولات ضرب وحرق وانفجارات او استعراضات فين القصه فن التمثيل هتلاقي بطل العمل هو المسؤول عن الخدع والسيارات والاكشن..ياشيخه.. انا اتكلمت اكتر حاجه عن السينما لانك جيتي عالجرح دي معشوقتي انا عمري ماكنت فيديو الا مؤخرا كانت السينما والمسرح حياتي كلها لكن هنقول ايه.

مشهد واحد كان حديث جميع مشاهدين صاحب المقام بتعملى ايه علشان لمجرد ظهوري كضيفة شرف تلفت الأنظار والكل يشيد بأدائك؟

صاحب المقام أو البيه البواب.. سيان المشهد الواحد حتي الدراما الفتوة ..  كلمة ابونا الملك فريد شوقي لو اترميت في البحر متغرقش قاوم قاوم لازم تطلع عالشط سليم،  وعادل أدهم قال لي عمر التمثيل ما كان بالمتر ده زى الالماظ بالمللي ..عايزه تمثلي يا تبقي بتاع قماش وده مش عيب بس هتلاقي اقمشه في كل حته وتفاصيل لكن جواهرجية .. مبيرجعوش في كلامهم وكل مادا بيغلا الالماظ ..فهمتي حاجه .. يعني لو انا الماظ بريقي هينور غصب عن اي حد ربنا خلقك الماس .. أما لو قماش كمان شويه يدوب ومش بعيد يمسحوا بيه الارض..انا بحط كل روحي واحساسي في الشخصيه فلما بتقول كلمه بتحبوها .. بس قبل كل شئ ربنا اصرف لي حبه وقبول احمده واشكر فضله وبعديه رضا امي.

نصيحة من نجمة كبيرة للنجوم الشباب؟ تقوليلهم أيه؟

انصح الشباب ..ركز في دورك فقط مالكش دعوة الباقيين مش لازم كله يبقي ستامبا عضلات واكشن والا ماكانش الكدواني وفتحي عبد الوهاب ومحمود عبد المغني من عباقرة جيلهم..والبنات شرحه خليكي انتي والله العظيم كلكم جميلات. قبل ما تلعبوا سيجا في وشكم  وسنانكم، جاذبية شادية كانت في بقها الصغنن وسعاد ونجلاء أسنانهم الملخبطه وهكذا اصلا البيه اللي يرسمكم مش احسن من ربنا ابدا استغفر الله وركزوا في الشخصيه مش البراندات ولله الامر  …

دورك في موسى مع محمد رمضان هنشوف نجمتنا بشكل مختلف عن الفتوة واولاد امبابة  ؟

دوري في موسى هنتكلم عليه لوحده كتير لان المسلسل مليان ناس انا شخصيا احب تمثيلهم ويمتعني اصدقه بس لما نشوف هيحصل ايه لسه مانعرفش حاجه احنا علي كف الرحمن ادعوا لنا دي عين محترمه .

الفنانة فريدة سيف النصر مع صاحبة السعادة

ايه رأيك بمنتهى الصراحة في المحتوى اللى بيتقدم في السينما حاليا؟

انا مش متابعه السينما اوي لان انتاجها قليل لاني مشغوله كتير بأمي يارب يبارك في عمرها ويشفيها..فمش صح اتكلم لكن ملاحظة اعلانات افلام كتير ورا بعضها مبتقعدش اسبوع احتمال علشان كورونا الله اعلم بس لاحس ولا خبر علي فكره عشان الثأر القديم ، افلامهم دلوقتي دي هي المقاولات بس على الاقل المقاولات كانت مليانه نجوم كبيرة.

ايه الحلو بالنسبة ليكي في 2020 وأيه الوحش اللى حصلك فيها؟ وتتمنى تحققي ايه في 2021؟

ربنا بيقول لا تسبوا الدهر فإن هو مني ..يعني نقول كل اللي جابه ربنا كويس و تحملناه بفضله ورحمته لنا.. واتمني العام الجديد ربنا يرفع عنا البلاء وعن العالم كله فا نحن جميعا عباده الضعفاء وأن يلطف بنا فا هو اللطيف وان لانفقد احباب بفضله وعدله وان يرزق الجميع رزقا مباركا فيه حلالا ويعطينا الصحه ويبارك في ذرياتنا ويكفينا شر كل شر  ويحسن ختامنا برضاه عننا.،ولا احسن من كده طلبات في رأيي من ملك كريم هو الله.