عاجلمنوعات

الساده أصحاب الأكشاك .. اوكار التربح والمساعده ع النصب

 الساده أصحاب الأكشاك
.. اوكار التربح والمساعده ع النصب

أتحدث اليوم ألي الساده اصحاب ألأكشاك وعايز اقولهم كلمتين بالبلدي كده واللي يزعل من الحق يتفلق يخبط دماغه في الحيط أو يشرب من البحر ..

🏛 .. عايز تبقي عضو أو مستشار بلجنة تقصى الحقائق سهله خالص انت بس حول او ادفع ١٢٠٠ جنيه او عضو منظمة دولية للتنمية أو حقوق الإنسان أو مستشار تحكيم دولي أو مستشار علاقات خارجيه او لو عايز تبقي عضو او تحصل علي شهادة شرفيه باللجنة القومية لدعم الدوله او عضو لجان مصالحات او منسق علاقات او الحريات الخ الخ الخ .. وبرضو لو عايز الشهادات اياها من التقدير الي الفخريه كلو موجوووود يافندم ..

🏛 .. طب عايز كارنيه صحافه في اغلب الجرايد والمجلات ساهله برضه انت بس أدفع الاشترك ٣٥٠ جنيه في السنه هيتبعتلك الكارنيه حتي لو هتتفرج بس ع اللي بيتنشر . طب عايز تنشر ف العدد الورقي الشهري للجريده برضه ساهله اكتبلك كلمتين وحول ٢٠٠ جنيه وصورتك وكلامك هينورو الدنيا حتي لو كنت مبتعرفش تكتب ولا عندك علم ولا ثقافه وكلامك زي قلته وكله اخطاء المراجع او الديسك مان هيقبلو ويراجع هو ويصحح من غير م ينطق ..
طبعا .. الا من رحم ربي
ولو معاك واسطه ومحسوبيه انسي الفلوس .. ولو هتبعت ع الخاص كام ديوان وكام مقال ينزلو لحد تاني وباسماء تانيه برضو أنسي الفلوس .. وهتتبعتلك دعوه ف كل مناسبه .. وكمان عضويه ف اللي يعجبك من الاحزاب .. اهي تنفع ف السيره الذاتيه لما تنزل ف النماذج المشرفه .. ومتنساش كتر من التطبيل.. حتي الرأي و الابداع والموهبه للمزايده ..

🏛 .. ولو عايز تظهر ف كام برنامج طبعا انت عارف الساعه هوا بتكفنا كام وبراحتك شوف عايز كام ساعه اتنين تلاته مش مشكله المهم تدفع ومتنساش تشد البدله ..
عايز تبقي مذيع بالمره تمام مشوار بس للنقابه هنطلعلك الكارنيه وتبقي زميل انت تؤمر وشوف بعد كده شق طريقك يا بالفلوس يا بالواسطه مش محتاجين اكتر من كده مش مهم انت حتي لو مبتعرفش تقول جملتين ع بعض م انت دافع يا باشا وياسلام بقي لو عرفت حد وعرفت تجيب كام اعلان وبالمعارف هتوصل .. والحظ بقي يلعب لو أتبناك حد واصل او جهه هتبقي ضربت معاك و وصلت ساعتها ياعم متخافش هتقبض واللي دفعته من فلوسك هيتردلك من جيوب الناس وع حسابهم بلا ثقافه بلا فكر بلا رساله كبر دماغك ياراجل..

.. ع فكره محدش يخاف مش هفضح حد و لا هقول أسماء ولا أتعودت ع كده اخلاقي وتربيتي تمنعني .. لكن سامحوني مبعرفش اخبي وبصراحه انا شايف ان اللي بيحصل ده قله دين وأخلاق وضمير و فساد ..

🏛 .. يا اصحاب الاكشاك وتوزيع الكارنيهات والألقاب الوهميه والمزيفه لا يلزمنا كدب ولا فشخره .. ولا عمرنا هندفع رشوه ولا هناخد مكان حد تاني دي هوايه واحنا بنتسلي ولازم صاحب الموهبه والجهد والقيمه والعلم والثقافه يفرض نفسه علي امثالكم وبيبقي غصب عنكم .
اللي بيقل بيقل نفسه . اللي بيدفع فلوس ف كارنيه بيكلف نص جنيه ده واحد ميستحقهوش اللي بيدفع فلوس علشان كلامه ينزل ده ميعرفش ان أعدادكم مدعومه من الدوله وبتاخدو دعم حسب الكميه بمثابه الفرق بين سعر البيع وتكلفه الطباعه وميعرفش كمان انه هو نفسه لو فاضي ومورهوش حاجه يعمل جريده ده لو هو حابب كده وبسهوله جدا مهياش كيميا يعني . واهو برضو يسترزق من كام واحد يقولهم أعلانات مثلا وهنزلكم أعلان ومدح وكلام او كام واحد عايزين كارنيهات فشخره علي كام واحد كمان من اللي بيحبو يشوفو صورهم منوره .

أسمعوها مني لله ..
حرام عليكم أنتو بتقضو علي المواهب وبتقتلوها . أتقو الله شويه كل ده حرام وهتتحاسبو عليه .. وعموما دي مش غلطتكم انتو بس لا وغلطه اللي يوافق علي حاجه زي كده لحد م يخليكم تعملوها سبوبه تضحكو بيها ع الناس .. ده بكده بيهين روحه وبيقلل من قيمه نفسه ده ان كان صاحب مبدأ و ليه قيمه مع ناس برضو واضح انها نسيت المبادئ والقيم و القيمه ..
ربنا يصلح حالنا وحالكم

مقالات ذات صلة

زر الذهاب إلى الأعلى
Don`t copy text!