الشاعرة سميرة محمودى تكتب انا في البحر بلطية

ساعات ع الشط جنية
زرعت الورد بالفدان
طرح من غير جناينية

عصايتي الف بيت مكتوب
وحبة حب تملى قلوب
سعيدة ف كل احوالى
وراضية وهو دا المطلوب

باحب الشعر دا عنيا
واحب الدنيا وردية
وبابني الحرف برج حمام
حلاوة الكلمة بالنية

باشاور للقمر يطلع
وبانده للهوى يسمع
وبغمز لو بطرفة عين
وبعديها النجوم تلمع

ساعات بيقولوا مجنونة
بجنى الشعر مفتونة
بتكتب للامل دواوين
ولو باليأس مسكونة

لمعني الشعر تفعيلة
تفصل قلبي تفصيلة
بحرف القوية والمناديل
باجدل شعرى تجديلة

ومهما يقولوا عزالي
باكون مبسوطة وف حالى
ولو عدت عليا النار
باعيش الجنة ف خيالى

وباحلم بيكو حواليا
بكل الناس سواسية
وكل الاهل والاحباب
هواهم كحل في عنيا

ودقة قلبي بنورة
بعشق الارض مسحورة
واغنيلك كتير يا سلام
ولو ماباينش ف الصورة

من اغاني سميرة ٦