عاجلعالم الفنمنوعات

حكاية لها العجب المكوجي اللي اتحول لـ أكبر شاعر غنائي بسبب رسالة للشغالة

حكاية لها العجب المكوجي اللي اتحول لـ أكبر شاعر غنائي بسبب رسالة للشغالة

السيد مرسي

كتبت:  دعاء سنبل

حكاية لها العجب المكوجي اللي اتحول لـ أكبر شاعر غنائي بسبب رسالة للشغالة تعرف على السر الذي حول حياته  .. وقلب دنيته رأساً على عقب تعالوا هحيلكم:

بداية الحكاية 

 

ذات يوم  قام الأستاذ مأمون الشناوي من نومه  ودخل خد حمامه وتناول إفطاره، واخرج من دولاب الملابس بدلة لسه جاية من عند  المكوجي. وبيلبسها  وبيحط إيده في جيب البدله. لقى ورقه مكتوب فيها اغنية ، لا عليها اسم. ولا رقم تليفون ومش بتاعته ومتأكد انه ما سمعش الكلام ده قبل كدة.

وسأل الشناوي نفسه ياترى  .. أيه اللى جابها اصلا في جيب الجاكت؟! ، كان صاحبنا  عنده بنت شغالة ، نادى عليها و قالها ايه الورقة دي وجت جيبي إزاي؟

فـ ارتبكت البنت واترجفت ولما ضغط عليها  .. راحت اعترفت بكل حاجة ، اعترفت ان في مكوجي بيحبها وكان بيبعتلها جوابات في هدوم مأمون الشناوي ، وهما اتخانقوا فغالباً بعتلها الجواب ده علشان يصالحها .. عمنا مامون طلب منها تنزل تجيب المكوجي وتيجي فورا.

ونزلت البنت قام اتصل بمحمود الشريف صاحبه والملحن العبقري، وقاله اسمع ، وسمعه كلمات الغنوة ، عجبت محمود جدا وقاله سكة جديدة عليك يا مأمون قاله مامون مش انا اللى كاتبها وحكي له الحكاية ، جه محمود وجه الواد المكوجي.

فـ سألوه أنت اللي كاتب الكلام ده ، ومش ناقلة من حد ، قاله لا يا بيه انا عندي من ده كتير، قاله طيب إحنا هناخد الكلام ونعمله غنوة تنزل باسمك في الاذاعة اتفقنا، ربنا يكرمك يا بيه ، وقف مأمون والشريف بيسألوا بعض مين بقى ها يغني حدوتة غرام المكوجي والشغالة دي.

قال الشناوي مفيش غيره عبدالغني السيد ، اصلا في الوقت ده كان التلاتة ثلاثي فني عظيم ، راحوا اتصلوا بعبد الغني السيد اللي كان في غزة وقتها بيسجلل أغاني لإذاعة غزة ، وقالوله ارجع فوراً عندنا غنوة ما حصلتش.

 

رجع عبدالغني السيد على ملى وشه واتهبل بالكلمات اللي كتبها المكوجي ده ، واللحن المجنون اللي عمله الشريف ووقف عبدالغني السيد بيسجل الغنوة في الاذاعة ، وتتذاع الغنوة وهوب تكسر الدنيا وتفضل عايشة للنهاردة وتبقى واحدة من أشهر أغاني عبد الغني السيد في تاريخه وهي أغنية “ع الحلوة والمرة مش كنا متعاهدين”.

أغنية الحلوة والمرة

 

👇👇👇👇👇

 

المهم بقا بجد في حكايتنا  مش مطربنا عبد الغني ولا وحتى المبدع مأمون الشناوي ولا الملحن محمود الشريف  .. المهم هو المكوجي اللي في لحظة دنيته  اتحولت وبقا من عمالقة الشعر الغنائي في مصر والمكوجي ده بقا هو مين هو  ..  “سيد مرسي” اللي أصبح شاعر مهم وكتب أروع واجمل الكلمات في تاريخ الغناء بـ الزمن الجميل  .. وغنى له معظم مطربين الفن الأصيل منهم نجاة وليلى مراد  .. وسعد عبد الوهاب ومحرم  فؤاد  .. ووردة الجزائرية وغيرهم من المطربين العظماء. 

مقالات ذات صلة

زر الذهاب إلى الأعلى
Don`t copy text!