أحمد عزت طفل الوسية وبوجي وطمطم يروي مشواره وينصح الجميع
كتبت: دعاء سنبل
الطفل المعجزة والفنان الموهوب أحمد عزت . عمل بالفن منذ نعومة أظافره ، عمل في الفن وعمره. أربع سنوات، ظل شكله وادواره محفورين فى أذهان أجيال الثمانينات والتسعينات، كان طفل موهوب ملفت للانتباه، يستطيع تجسيد أصعب الأعمال ، وقف أمام عمالقة الفن، أبكى المشاهدين عندما جسد دور الدكتور خليل حسن خليل طفلا فى مسلسل الوسية، وهو على البدرى فى ليالى الحلمية، لذلك استحوذ على العديد من أدوار البطولة والأدوار الهامة فى عدد من أهم الأعمال الدرامية، ومنها:
” ليلة القبض على فاطمة، الوجه الآخر، للحب أشياء أخرى،هى وغيرها، رجل الأقدار، الكهف والوهم والحب، اللقاء الثانى، حارة الشرفا، لا إله إلا الله، عدالة الإسلام، دمعة على خد القمر،
وغيرها من الأفلام والمسلسلات، إضافة إلى العديد من برامج ومسلسلات الأطفال ومنها :” بوجى وطمطم، أجمل الزهور، زهور من نور، حادى بادى، والبرلمان الصغير،وعلاء وصفاء والأصدقاء، وغيرها”.
كتب اليوم أحمد عزت عبر حسابه الشخصي مشواره منذ بدايته ونصح الجميع بعدم التخلى عن حلمههم لأخر نفس بـ عمرهم.
الطفل المعجزة والفنان الموهوب مع صاحبة السعادة
أضاف الفنان أحمد عزت
حلمك هو اللي بيدي لكل لحظة في حياتك قيمة
انا اتولدت لاقيت نفسي بـمثل .. أول عمل كان عمري ٤ سنين ومن العمر دة ولغاية ما بقيت ١٣ سنة وانا با اقف ادام الكاميرا بحصيلة تعدت الخمسين عمل تقريبا وكان آخرهم في المرحلة دي دور بطولة في الوسية اللي الحمدلله اعتقد انه اتعمل بشكل كويس
بعدها قررت ابعد مش علشان حاجة غير بسبب كم الضغوط عليا في الفترة دي تصوير صبح وليل وأكتر من عمل في وقت واحد دة غير المذاكرة والمدرسة علشان كدة باعتقد ان التمثيل في المرحلة دي صعب جدا للطفل خاصة اللي بيشتغل كتير
أستاذ اسماعيل عبد الحافظ الله يرحمه كان هايتجنن ومتضايق جدا وكلمني وكلم امي اني ارجع عن قراري لكن انا كنت خلاص مش قادر
خدت قراري وماداخلتش المعهد حتى وكان عندي قناعة كاملة اني لازم ابعد، وانا في مرحلة الكلية حسيت اني باعمل حاجة غلط، انا ايه اللي عملته في نفسي دة ليه بعدت، وقررت ارجع بعد الكلية مباشرة، ونظرا لاني ارتبطت واتجوزت بدري أولوياتي اتغيرت تاني وكان لازم اشتغل بدخل ثابت وبعد سنة اكتشفت اني رغم نجاحي في شغلي بالنسبة لحد في بداية حياته لكني مش لاقيني.
أحمد عزت لم يستطع تغير جلده
قلت لنفسي انا ممثل على فكرة مش محاسب وقررت اخد ساعتها قرار الرجوع للحاجة اللي باحبها .. كان عمري ٢٤ سنة تقريبا وفعلا الفترة دي عملت اكتر من عمل. رجل الاقدار وحاجة بسيطة في الاصدقاء وقناديل البحر ومسلسلات كتير في صوت القاهرة.
ولأني مقتنع بأهمية الممارسة والتعليم اشتركت في أول ورشة بمركز الإبداع الفني واتعلمت على ايد الاستاذ الكبير خالد جلال كان معايا نضال وبيومي فؤاد وسامح حسين وايمان السيد وعلشان انا ابن الوسط فكنت عارف قيمة النقابة واهميتها فرحت دخلت لجنة تقييم وبدأت اطلع تصاريح عمل بعمل لكن النقابة قررت توقف التصاريح فلاقيت نفسي مضطر ابعد تاني وطبعا اضطريت ادور على شغل ثابت لأني متجوز ومخلف وبعد ما اشتغلت فترة لاقيت فرصة اني اتعلم مونتاج.
اضاف الفنان “ماكدبتش خبر”
اتعلمت والمكان اللي اتعلمت فيه طلب مني اشتغل معاهم بالقطعة وبدأت رحلتي مع المونتاج اللي مرتبط بالحاجة اللي باحبها واللي كان املي اني من خلاله اقدر ارجع امثل تاني
اشتغلت في اكتر من مكان OTV ON tv و ام بي سي مصر والعربية مكتب القاهرة وأخيرا مسكت المونتاج في قناة الغد
والحمدلله بعد سنين كتير من عملي في المونتاج أصبحت عضو عامل في نقابة المهن السينمائية
وكنت كل فترة اعمل محاولة مع مخرج او مساعد من اصحابي اللي اعرفهم اشوف ممكن اعمل حتى مشهد
لغاية ما كلمني ا تامر حمزة عن مشهد مهم في قيد عائلي بعد ٣٠ سنة بالتمام من الوسية
والحمدلله طلع كويس وعجب اللي شافه
وبعدها جالي مشهد في الاختيار في حلقة مهمة والحمدلله رد فعل الناس يفرح ويشجع حسيت اني سمكة رجعت الميه تاني بعد ما كانت هاتموت
انا اتولدت ممثل وهاموت ممثل مش شرط هامثل ايه او حجم الدور المهم اني زي ما انا .. ممثل.
“طولت في الكتابة انا عارف”
بس انا اعتبرتها فضفضة حتى لو ماحدش قراه
ماتسيبش حلمك وماتستغناش عنه خليك وراه حتى لو ما اتحققش في يوم يكفيك انك عايش على أمل أن بكرة يكون احسن.
