الفنانة ندى عبدالله تفتح قلبها وتحكي عن مشوارها وأمنياتها في 2021

ندى عبدالله  .. بدايه مشواري الفني انا بدأت كموديل إعلانات وموديل كليبات

الحمدلله انا كان ليه حظ اقف قدام ممثلين كبار اتعلمت منهم جدا ومخرجين كمان

أنا أمنيتي في 2021 أن ربنا يكرمنا جميعاً وتبقي سنة خير علينا جميعا يارب

إعداد / مروة سامي وحوار / دعاء سنبل

ندى عبدالله مذيعة ومقدمة برامج وفنانة متميزة وموديل إعلانات، فهى حقا فنانة شاملة، أختفت بعض الوقت للاهتمام بزوجها وطفلتها الوحيدة فريدة، ولكن لان الفن يجري بدمها فهى لم.تتوقف بدون إبداع وشاركت زوجها عمل فيديوهات على تطبيق الفيديوهات القصيرة” تيك توك ” حصلت من خلاله على إعجاب الكثير.

شاركت ندى في العديد من الأعمال الفنية فى مجال الدراما والسينما منها مسلسل شط فى اى بى بفيلم المماليك فيلم بوسى  كات وفيلم ليلة خميس وشاركت  في مسلسل وجع البنات وغيرهم من الأعمال.

وشرفت بوجودها معي اليوم في حوار خاص بـ جريدة التايم المصرية تجيب بكل بساطة وصراحة أهلا بيكي نورتينا وشرفتينا  ..

بدايةً: كيف بدأتي مشوارك الفني ..؟! 

بدايه مشواري الفني انا بدأت كموديل إعلانات وموديل كليبات وقعدت فترة طويلة جدا في الموضوع ده وبعد ده دخلت أول حاجه تمثيل كان فيلم المماليك وللأسف لم  يتم عرضه لحد دلوقتي مَش عارفه فيه مشاكل إنتاجيه أو مشاكل توزيع معرفشي بس ده كان اول عمل ليه كتمثيل أعمله وكان دور حلو جدا وفادني كثير بصراحة وكان اول عمل ليه كان معايا رامي وحيد وخالد حمزاوي وعمرو عبد العزيز مجموعة حلوه اووي وكان من الأفلام الجميله بس ملقاش حظ ان هو ينزل لحد دلوقتي .

متى اكتشفت نفسك فى موهبة التمثيل وكيف اكتشفت ذلك؟

موهبة التمثيل معايا من ايام الدارسة ياعني من أيام إبتدائي وإعدادي وثانوي كنت ديما بشترك في مسرح المدرسة. في أعمال فنية سواء تمثيل أو غناء بس طبعا كان التمثيل هو الا جوايا  . اكثر  ياعني ولما جيت ادخل المجال بقي العملي فعلا كان صعب شوية لإن كان فيه ناس كثير زي نفسها تمثل. فبدأت الموضوع خطوة خطوة من موديل إعلانات إلي موديل كليبات لغاية مادخلت خطوة التمثيل كل ده طبعا كانت الإذاعة لسه مَش في دماغي خالص ولا كنت بفكر فيها نهائي.

من إحدى لقائاتها

عملتى في بدايتك مذيعة ايهما تفضلي؟ الفن و الاعلام؟

انا معملتش في بدايتي كمذيعة زاي ماقولت في الاول كانت بدايتي موديل ودخلت التمثيل عن طريق فيلم المماليك وإختيار السيناريست عمرو فهمي ليه في الفيلم وفيما بعد إختارني المخرج والمنتج إيهاب إسماعيل كان صاحب قنوات ولاد البلد وإختارني إن أنا أكون مذيعة لنشرة فنية بتكلم عن الفن الشعبي وإختياره ليه كان بناء علي إن أنا كنت موديل كليبات ويمكن أكثر الكليبات الا عملتها كانت شعبي فكان هو عارف علاقتي بفنانين الشعبي كثير جدا فجات فكرة هنا النشرة الفنية الشعبي إن أنا أنزل اعمل معاهم لقاءات بما إنهم أصدقائي فكان الموضوع سهل وده كان اول برنامج ليه والحمدلله عدي كويس ولقي نجاح كبير من ناس كثير أوووي وشجعوني ومن هنا إبتدت خطوة المذيعة .

من بعد برنامج النشرة الفنية الشعبي إبتدت هنا خطوة جديدة خالص عن مجال الموديل خالص مبقتشي أعمل إعلانات ولا كليبات ثاني وركزت في موضوع الإذاعة وكنت مهتمية بيه جدا طبعا في البدايات كان فيه شوية غلطات فاإبتديت أخد نصايح من المخرج ونصايح من المصور حاجات معينه اعملها كمذيعة وابتدت معايا هنا سلسله برامج بقي عملتها وكانت البرامج كلها خاصة بالفن معملتش برامج سياسية خالص معملتش اي برامج حتي البرامج الحوارية الا عملتها كانت خاصه بالفن والسينما كان فيه برنامج اسمه سينما المصروية وعملت النشرة الفنية عن السينما وعملت حوار صريح وعملت كذا حاجه كلها خاصه بالفن .

 من وجهة نظرك مين عليه العبء الأكبر في نجاح العمل؟ الممثل ولا المخرج؟

الا عليه العبء مَش ها اقولك الممثل لوحده ولاالمخرج لوحده لازم الإثنين يبقوه شاطرين ياعني لازم يبقي مخرج شاطر جدا قدامه ممثل موهوب  وبيحب التمثيل المخرج ها يعرف يطلع منه كل الطاقه الا جواه والممثل ها يقدر يساعد المخرج ان هو يجيب كل الا عنده بطبيعه وبتلاقائية فا انا شايفة إن الإثنين بيكملوه بعض صعب أن إنتي تجيبي واحد مَش ممثل محترف او مَش ممثل عموما او معندوش موهبة وتحطيه قدام مخرج ها يتعبه جداً وها يحاول يطلع منه بقدر الإمكان بس ها يتعب معاه في الأخر أنا شايفه إن الإثنين بيكملوه بعض مَش المخرج والممثل فقط كمان السيناريو والمونتاج كل الحاجات ديه بتكمل بعضها لكن طبعا في البدايه المخرج رقم واحد والممثل معاه شاطر ها يطلعوه حاجات حلوه جدا .

قمتي بالوقوف أمام  فنانين مختلفين منهم شباب صاعدين ومنهم عملاقة سواء تمثيل واخراج  مين أكتر حد وقفتي قدامه وساعدك وتتمنى تشتغلي معاه تانى؟

الحمدلله انا كان ليه حظ اقف قدام ممثلين كبار اتعلمت منهم جدا ومخرجين كمان كبار وشطار واستفدت منهم كثير اووي اوووي يمكن غيرولي حاجات كثير في شخصيتي كفنانه اشتغلت مع المخرج العظيم الكبير محمد أبو سيف كان ليه الشرف اني اشتغل معاه في فيلم المشخصاتي2 وبالرغم ان هو كان مشهد واحد فقط لكن انا بالنسبالي ده. كان علامه كبيره أوووي في مشواري الصغير ده. إن انا اقف قدام مخرج كبير زاي محمد ابو سيف طبعا المخرج احمد النحاس انا عامله معاه مسلسل وجع البنات من المخرجين القدام المعروفين والشطار جدا. وهو مخرج ومنتج المسلسل بردوه حطني في دور جديد عليه تماما واختياره ليه في الدور ده بصراحه شجعني جدا انا كنت اول مره  اعمل دور بنت محجبه. ولها شخصيه معينه واتعلمت منه كثير بصراحه .

طبعا بالنسبه للفنانين احنا كشباب كثير اوووي اشتغلت مع شباب في سني شباب طالعين كوجوه جديده شباب معروفين اكثر نجوم بقي اكثر طبعا. سلوي عثمان من الناس. الا بتمني اشتغل معاها ثاني لانها كانت طالعه مامتي في فيلم بوسي كات فنانة بمعني الكلمه فنانة وانسانه فظيعه. بصراحة اشتغلت مع راندا البحيري من الناس الجميلة راندا. حد متواضع جدا في اللوكيشن حد جميل أوووي. وبتكلم وبتتعامل ومش بتبخل علي اي حد بأي حاجه ممكن تقدمهاله طبعا اتعاملت مع الفنان رامي وحيد فنان بمعني الكلمه من الناس الا انا حبيتهم اوووي. وحبيت ان انا اشتغلت معاه وديه بالنسبالي من الحاجات الا انا بتشرف بيها .

إحدى لقائات ندى التلفزيونية

ايه العمل اللى بعد ماعملته حسيتي ان الناس عرفتك وبيقوا لما يشوفك في الشارع ينادوا عليك؟

انا مَش ها اكدب واقول انه ممكن يكون فيه عمل من اعمالي بقيت امشي في الشارع حد يشاور عليه انا طبعا كنت اتمني ان كل عمل انا اعمله الاقي الناس متابعه كويس.

وتشوفوه يمكن حظي مكنش حلو اووي في عرض كل عمل انا عملته يمكن النيت اتعرض في رمضان وسط مسلسلات كبيره اوووي. وهو أتعرض للاسف علي قنوات صغيرة. ومكنش ظاهر جدا للناس نفس الكلام مسلسل VIP يمكن بس فيلم بوسي كات لان كانت صورتي معروضة علي افيش الفيلم. وكان نازل في اماكن كثير كده وسط البلد والهرم أماكن كثير.   فمجرد كنت ادخل اي مول موجود فيه الفيلم كان ممكن الناس تشاور وتقول ان ديه الا موجوده في الفيلم بس موجوده باسم الشخصية ميعرفوش اسمي انا شخصيا كانوا يندهولي يقولولي يا بطه. ده  بالنسبه لاعمال التمثيل فيلم بوسي كات هو الأعلم مع الناس في السينمات ولو انا تواجدت في مكان فيه الفيلم ممكن الناس تبقي عرفاني لكن عندي في الشارع او في محلات بدخلها او حاجات كده كل الناس متعلق في ذهنهم ندي الموديل يمكن عشان كانت قنوات الاغاني كثير. وانا ليه كليبات كثير جدا. وكانت بتتعرض كثير يمكن ديه اكثر الحاجات الا يمكن الناس شافوني فيها لحد وقتنا هذا. انا لو دخلت محل ممكن يقولولي انتي الا كنتي طالعه في الكليب الفولاني. انتي إلا عاملة اعلان يمكن الاعلانات. والكليبات هي إلا معلقه مع الناس اكثر لحد دلوقتي.

بالنسبة  تجربة التوك توك مع زوجك والفيديوهات اللى عملتيه افادتك واحكيلنا على كواليسها؟

فكرة التيك توك او فيديوهات التيك توك جات من وقت الحظر طبعا انا جوزي مَش ممثل انا جوزي مطرب وابتدت. الفكره. تيجي من فيديو واحد عمله كوميدي شويه ونزلناه ولقيني الناس مبسوطة بيه جد. ا  فقولتله ايه رأيك بقي. بما اننا احنا قاعدين فاضيين ولا انا بمثل ولا انت بتغني ياللا نعمل ده علي التيك توك. وابتدينا من هنا نعمل سلسلة بقي الفيديوهات وسميناها يوميات ندي وبيسو. لقيت انه فيه ناس كثير جدا فرحانه بيها ولقيت انه ناس بتدخلي علي الخاص اعمله ياللا فيديو جديد. ولقيت ناس بتسأل علي الفيديوهات الجديده. ابتديت انزلها علي الجروبات والناس فرحانه بيها اوي وبتضحك عليها اوي وابتدينا. نغير بقي شوية في لبس واكسسوار علشان نطور الموضوع شوية .

يمكن في البداية انا جوزي كان مكسوف شويه ان هو يعمل في التوك توك. لكن بمجرد ما دخل في أول فيديو وثاني فيديو دخل في المواد. وابتدينا نتعامل جدا والموضوع ابتدي يبقي معانا حلو اوي ونقترح حاجات ممكن تضحك الناس في وقت الحظر كانت كل الناس مخنوقه وكل الناس قاعده في البيت فحبينا نعمل حاجة نفرح احنا فيها ونضيع وقتنا بها. وفي نفس الوقت ممكن ننزلها للناس تنبسط بيها من الكومنتات الا كنت بحبها اوي الكومنتات الا كانت الناس تقولي فيها والله ياندى انتي هون علينا الحظر. بصراحه كانت عندي انا بالدنيا يمكن بقالنا فتره موقفين فيديوهات. بسبب ظروف وفاة اخو جوزي ووفاة والده. علشان كده بقالنا فتره منزلتش حاجه علي التوك توك. بس ان شاء الله قريب هانعمل فيديوهات حلو اووي. وهنرجع تاني نعمل حاجات تعجب الناس . 

2020 بما انها اوشكت على الانتهاء؟ ايه الحلو فيها بالنسبة لك وايه الوحش اللى قبلك فيها؟

الموجه الثانيه من الكورونا ظهرت لكن انا عندي امل في ربنا انه ها يزيح الغمه ديه قريب ويرفع عننا الوباء والبلاء ويااارب ندخل السنه الجديده بخير وسعاده وصحه وسلامه انا ديه اكثر حاجه يتمناها وانا بحمد ربنا ان انا واهلي بخير وكويسين والحمدلله علي كل حال طبعا وبإذن الله نرجع أحسن من الأول .

ايه امنيتك في عام 2021؟

أنا أمنيتي في 2021 قبل أي حاجه طبعا ولو سألتي اي حد ربنا يرفع عننا الوباء والبلاء يااارب نفضل بصحتنا ويارب الصحه. والستر ويارب يكرمنا جميعا. الا مَش شغال ها يرجع شغله والا تعبان ان شاءالله. ربنا يشفيه بتمني ان شاء الله السنة ديه تبقي خير علينا جميعاً. اعمل فيها شغل حلو وجوزي يعمل فيها شغل حلو. ان ربنا يخليلي بنتي ويبعد عنها اي شر واي مرض. وربنا يكرمنا جميعا وتبقي سنه خير علينا جميعا يارب ويحفظلي امي ويعطيها الصحه .

.

.